Euri Albisu 
Euskal Herrian Euskaraz 

Euri Albisuk azaldu digu zergatik ikusten duten beharrezko Bilbon euskararen udal ordenantzak ezartzea.

Euskara ordenantza Bilbon zergatik eta zertarako?
Bilbo da Euskal Herrian euskaldun gehien biltzen dituen udalerria. Aldi berean ordea, Bilboko udala da, euskara ez bermatzeagatik salaketa gehien jaso duena. Kontseiluak Euskal Herriko udalerrien hizkuntza politiken neurketa egin duenean, 10etik 2,61 puntu lortu ditu Bilbokoak, lotsagarria benetan. Alkatea erdaldun hutsa da, InfoBilbao aldizkariak, udalbatzak, Bilbao udal egunkariak eta udaltzaingoak argi erakutsi dute euskararekiko begirune eza. Argi dago Bilbon, euskaldunok bigarren mailako hiritarrak garela, ez baitira gure hizkuntza eskubideak errespetatzen. Euskaldunok ezin dugu gure egunerokotasunean euskaraz bizi.

Udal ordenantzak euskararen inguruko lege-arauak ezartzen ditu herrian. Hau da, udalerrian euskararen marko juridikoa definitzen du. Horregatik, Euskal Herrian eta Bilbon herritarron hizkuntza eskubideak eta euskararen ofizialtasuna bermatzeko aukerarik ez dugun bitartean, hori bideratzeko tresna dugu udal ordenantza.

Zertan datza EHEk aurkeztu duen proposamenak?
Esan bezala, udal ordenantzak euskararen inguruko lege-arauak ezartzen ditu, eta EHEk lege-arau horiek sortu eta idatzi ditu. Bertan, herritarren hizkuntza eskubide eta euskarak alor ezberdinetan izan beharreko presentzia zehazten dira, besteak beste. Hala nola, langileen euskalduntzea, lanpostuak betetzeko prozedurak, agiriak, errotulazioa, garraio publikoa, dirulaguntzak, komunikabideak, irakaskuntza ezunibertsitarioa, udal haurtzaindegiak, helduen euskalduntze alfabetatzea eta abar.

Urratsez urrats Euskal Herri euskalduna lortzeko, premiazkoa eta ezinbestekoa da euskarari lehentasunezko tratamendua aitortzea eta bilbotarrek normaltasun osoz eta dagokien eskubidez, euskara alor eta eremu guztietan erabili dezaten neurri zehatzak hartu eta aplikatzea. Bilboko udalak, neurriak hartu behar ditu benetan Bilbon euskaraz bizitzea posible izango bada. Euskarak arautua egon behar du eta euskara normalizazio bidean jarriko duen neurriak hartu behar dira. Beraz, Euskal Herri euskaldunaren bidean beste urrats bat delako, Bilboko udalean euskara ordenantzak onartzea eskatzen dugu EHEtik.

Proposamenaz gain, hainbat eragilerekin dinamika bat abiatu duzue, azalduiguzu piska bat.
Bilbon badira euskararen inguruan lanean gabiltzan hainbat eta hainbat eragile. Gure ustez, eragile hauen kohesioa lortu eta guztiok batera elkarlanean, Bilbon euskararen normalizazioan beste urrats bat eman behar da. Guztiok, Bilbotarron hizkuntza eskubideak bermatzeko urratsak emateko eskatu behar diogu Bilboko udalari. Horretarako, datozen hilabeteetan, sortu ditugun udal ordenantzak udalean aurkeztea da gure asmoa.

Alderdien, eta bereziki udal gobernuaren jarrera zein izan da?
Egun Bilboko udalak jaso dituen salaketa guztiak ikusita, argi dago euren jarrera utzikeriarena dela, Bilboko udalean dagoen euskara planaren epeak edo plana bera betiko luza daiteke, epeak ez dira betetzen eta horiek ez dira neurri egokiak euskararen normalkuntzarako. Gainera, oso esparru mugatuko planak dira Bilboko udalak martxan jartzen dituenak.

Aurrera begira, behin udal ordenantzak aurkezten ditugunean, euskara zinegotziarekin biltzeko asmoa daukagu; euskara benetan Bilboko hizkuntza ofiziala izan dadin eta Bilbo euskalduntzeko emateko prest dauden urratsak zeintzuk diren ikusteko. 

Comentarios

Añadir nuevo Buscar RSS

Escribir comentario
Nombre:
Email:	No notificar:Notificar:
Website:
Título:
	Por favor introduce el código anti-spam que puedes leer en la imagen.

Powered by !JoomlaComment 3.12

Copyright (C) 2007 Alain Georgette / Copyright (C) 2006 Frantisek Hliva. All rights reserved.