PSOEk bultzatzen duen “partehartzea

Udaletxetik oposizioa indarrez atera dutela aprobetxatuz, udal hauteskundeetatik hona PSOE herritarren zein eragileen aurrean parte hartzearen sustatzaile bakar gisa agertzen ari da. Bitxia da iazko maiatzaren 27an 12.800 bilbotarrei oinarrizko eskubideak diren hitza eta boto eskubidea ukatu zizkien PSOEk berak orain herritarren aurrean parte hartzearen aitzindari gisa agertzea.

Hori gutxi balitz, PNV, PP eta Aralarekin batera aurkeztu zen IUren ezinbesteko laguntzarekin hamaikak eta bi egiten ditu herritarrek bozka bidez aukeratutako ezker abertzaleko ordezkarien parte hartzea galarazteko edozein instituzio edota udal kontseilutan, hau da, udalbatzan, barrutiko kontseiluetan, udal sozietateetan, Jai Batzordean eta abar luze batean.

Nazio Batuen Giza Eskubideen oinarrizko kartak zein Eskubide Zibil eta Politikoen Nazioarteko Itunak pertsona bat bozka bat hartzen dute parte hartzearen oinarritzat. PSOEk, printzipio hori ezeztatzen duen eragile nagusietariko bat den heinean, ideien ilegalizazioaren eta jazarpen ideologikoaren egilea den heinean, herritarrak eskubide zibil eta politikorik gabe uzten dituen heinean, ez du inolako zilegitasunik parte hartzearen inguruan inori irakaspenak emateko.