Okupazioaren hautua egin dute Erribera kalean

Zergatik hartu okupazioaren bidea?
Bilboko etxebizitza politikak eraman gaitu honetara, Bilbon 15.000 etxebizitza huts daude eta gazteok ez dugu etxebizitza duin bat izateko eskubiderik. Egoera larri honen aurrean okupazioa izan da gure aukera.

Etxebizitza hau ordea abandonatua egon da denbora batez, bertan bizitzeko hainbat konponketa egin beharko dituzue, ezta?
Hala da, baina Bilboko okupazio mugiomenduan badugu lanerako indarra eta gogoa. Auzolana egiten dugu auzo desberdinetako kideen artean eta horrela bergaitzen dugu etxebizitza duintasunez bizi ahal izateko.

Eraikina ordea ez da zuena, norena da? Salaketarik izan al duzue?
Bai noski, konstruktora batena da, jadanik salaketa bat jaso dugu, 20 pertsona gaude bertan inputatuta, geure borondatez identifikatu ginen. Konstruktorak duen proiektuan eraikin honetan luxuzko etxebizitzak eraikitzea da helburua, alboan bere aparkaleku eta guzti.

Zer egingo duzue salaketa eta balizko desalojoaren aurrean?
Erantzun egingo dugu, noski. Ez gara geldi geratuko, geure bizilekua defendatuko dugu barruan erresistentzia eginaz eta kalean protesta eginaz.

Nola konpon daiteke etxebizitzaren arazoa?
Arazoa orokorra eta alde askotakoa da, eta soluzioak ere halakoa izan behar du. Guk geure eskuetan dagoen tresna erabiltzen jarraituko dugu: okupazioa. Tresna hau egoera larrienetan gera-tzen zaigun bide bakarra da, okupazioaz kapital pribatuaren aurka egiten dugu eta baita instituzioen aurka ere.