Indarkeria sexistak bost emakume erail ditu 2008an Euskal Herrian. Horretaz gain, ehunka eraso zein bortxaketa izan dira; desagertuta jarraitzen duen Maria Puy Perez lizarratarraren kasua albo batera utzi gabe. Hori dela eta Bizkaiko Emakume Asanbladak, azaroaren 25ean, Emakumeekiko Indarkeriaren aurkako nazioarteko egunean, ahotsa altxatzeko deia luzatu die jendarteko emakume zein gizon guztiei. Manifestazio bat antolatu dute astearterako. Mobilizazioa arratsaldeko 7:30etan abiatuko da Arriagatik. Eguerdiko 12:30etan, euskal sindikatuak deitua kontzentrazioa egingo da Foru Jauregiaren aurrean.

Bizkaiko Emakume Asanbladak kaleratutako oharra:

Azaroaren 25ean, Emakumeen aurkako bortxakeria errotik desagerrarazteko nazioarteko egunean, Koordinadora Feminista honetako elkarteek berriro ere adierazpen bat egin behar dugu emakumeok jasaten dugun bortxakeria salatu eta honen kontrako asmo sendoa erakusteko.

Gizonek emakumeen aurka eragiten duten bortxakeria hainbat izaera eta baldintzatako emakumeengana iristen da, herrialdeak zeharkatzen ditu eta ez du diru-sarrera eta heziketa-mailarik errespetatzen. Arazo unibertsala da, munduko emakumeak tragikoki batzen gaituen arazoa.

Emakumeen aurkako bortxakeria ezin da aztertu eta landu bizi duguneko gizarte eredu sexista kontuan hartu gabe, egiturazko arazo larri bati egin behar baitiogu aurre, eta arazo hori konpontzeko patriarkatua eraitsi beharra dago.

Azken urteetan egindako lanari esker lortu dugu harreman afektiboetan oinarritutako indarkeriaren aurrean begiak zabaltzea; indarkeria hori ikustezin egiten zuen benda begien bistatik kenduz. Zoritxarrez ordea, indarkeria moten fragmentazioa ekarri du horrek eta indarkeria sexista bere osotasunean ikustezin egitea ere bai.

Behingoz argi utzi nahi dugu gizonek emakumeen aurka eragiten duten bortxakeria kontu publikoa dela eta gizarte osoaren aktibazioa eta inplikazioa eskatzen dituela: emakumezkoena, gizonezkoena, komunikabideena eta erakunde publiko eta pribatu guztiena. Elementu horiek guztiak kontuan hartzen ez dituen oro txatalak jartzea izango da eta ez arazoari errotik heltzea, eta bitartean emakumeak irainduak eta erailak izango gara.

Exijitzen dugu:

• Genero indarkeria kasuen ardura duten epaitegiek beregain har dezatela emakumeok jasaten ditugun indarkeria sexista kasu guztien ardura.
• Jabekuntza, maila indibidual nahiz kolektiban garatzeko prozesuei bultzada ematea eta emakumeon arteko antolaketa eta talde eraketak sustatzea indarkeriari aurre egiteko giltzarri gisa.
• Gizonen errakzioa: jarduneko inplikazioa izan dezatela, gure gizartean emakumeen aurka eragiten den bortxakeria matxista salatzean eta deitoratzean, bai eta sexu bat bestearen gainetik dagoela oinarritzat ez duen gizonezkotasun eredu berriak sortzean.
• Gizartearen eta herritarren heziketa, emakumeen aurkako bortxakeria sorrarazten duten kasuak errotik deuseztatzeko eta errespetu eta berdintasunezko harremanak sustatzeko.
• Komunikabideen konpromisoa eta inplikazioa emakumeak iraintzen dituzten irudi, lengoaia eta eduki sexisten aldaketan duten erantzukizunagatik, hori ere bortxakeria dela irizten baitiogu.
• Erakunde publikoen estrategia argi eta zehatzak. Herri administrazioaren inplikazioa bortxakeria patriarkalaren aurkako borrokan, babeserako eta salaketara behar adinako baliabideak erabiltzea, bai eta prebentzio eta prestakuntza planak sortu eta heziketa bide formal eta informalen bidezko kanpainak bideratzea ere. Gaur egunean eta etorkizunean emakumeak autonomoki bizitzeko dugun eskubidea bermatuko duten neurriak hartzea, alegia.

Comentarios

Añadir nuevo Buscar RSS

Escribir comentario
Nombre:
Email:	No notificar:Notificar:
Website:
Título:
	Por favor introduce el código anti-spam que puedes leer en la imagen.

Powered by !JoomlaComment 3.12

Copyright (C) 2007 Alain Georgette / Copyright (C) 2006 Frantisek Hliva. All rights reserved.